Auglýsing: Viðauki við stjórnunar- og verndaráætlun Vatnajökulsþjóðgarðs, vegna Breiðamerkursands
Viðauki við stjórnunar- og verndaráætlun Vatnajökulsþjóðgarðs vegna Breiðamerkursands er nú kominn í opið samráðsferli.
![Breiðamerkursandur, Þröng, Breiðamerkurjökull, Þorvarður Árnason](/_next/image?url=https%3A%2F%2Fimages.prismic.io%2Fvatnajokulsthjodgardur%2F9183fee8-2dad-482c-b1ad-660af0f9a976_2021%2B01%2B29-%2Bauglysig%2Bum%2Bvidauka%2Bvegna%2Bstjorn%2Bog%2Bvernd%2Bbrm.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1640%26h%3D820&w=3840&q=80)
Viðauki við stjórnunar- og verndaráætlun Vatnajökulsþjóðgarðs vegna Breiðamerkursands er nú kominn í opið samráðsferli. Breiðamerkursandur varð hluti af Vatnajökulsþjóðgarði um mitt ár 2017 og fljótlega eftir það hófst undirbúningur fyrir gerð stjórnunar- og verndaráætlunar fyrir svæðið.
Gerður var samningur við Rannsóknasetur Háskóla Íslands á Hornafirði, Náttúrustofu Suðausturlands og Nýheima þekkingarsetur um ráðgjöf og vinnu við gerð tillögu að stjórnunar- og verndaráætlun fyrir Breiðamerkursand. Ráðgjafahópurinn tók saman greinargerð þar sem finna má nánari upplýsingar um tillöguna.
Við gerð stjórnunar- og verndaráætlunar fyrir Vatnajökulsþjóðgarð er lögð aukin áhersla á samráð. Lög og reglugerð um þjóðgarðinn kveða á um hlutverk svæðisráðs varðandi samráð við Umhverfisstofnun og Náttúrufræðistofnun Íslands og eftir atvikum aðrar hlutaðeigandi fagstofnanir ríkisins (Lög nr. 60/2007, 12. grein). Svæðisráð skal enn fremur tryggja samráð við landeigendur, sveitarstjórnir og aðra hagsmunaaðila á svæðinu.
Viðaukann, greinargerðina og önnur skjöl sem tengjast vinnunni, má finna hér.
Vatnajökulsþjóðgarður óskar eftir athugasemdum við viðaukann og skulu þær berast á netfangið [email protected] ekki seinna en 15. mars n.k. Eintök af viðauka og greinargerð munu liggja frammi í Gömlubúð á Höfn, í Skaftafellsstofu, í Ráðhúsi Hornafjarðar, og í afgreiðslu í húsi Náttúrufræðistofnunar Íslands í Garðabæ.
Nánari upplýsingar veitir Steinunn Hödd Harðardóttir, starfandi þjóðgarðsvörður á suðursvæði Vatnajökulsþjóðgarðs, í síma 470 8332.