Guðrún Jónsdóttir þjóðgarðsvörður í Jökulsárgjúfrum
Guðrún Jónsdóttir hefur tekið við starfi þjóðgarðsvarðar í Jökulsárgljúfrum frá og með 1.janúar 2023.
Guðrún tekur við starfinu af Guðmundi Ögmundssyni sem sinnt hefur starfi þjóðgarðsvarðar frá vormánuðum 2016 en þar á undan hafði Guðmundur starfað sem aðstoðarmaður þjóðgarðsvarðar á suðursvæði frá 2010.
Guðrún er einn af reynslumestu starfsmönnum Vatnajökulsþjóðgarðs á sviði náttúruverndar en hún hóf störf í Þjóðgarðinum í Jökulsárgljúfrum sem verkamaður árið 2000. Hún hefur víðtæka reynslu af landvörslu, rekstri og mannauðsmálum og hefur frá árinu 2014 starfað sem aðstoðarmaður þjóðgarðsvarðar í Jökulsárgljúfrum.
Guðrún er fædd og uppalin á bænum Núpi í Öxarfirði. Hún er með BS próf í búvísindum frá Landbúnaðarháskóla Íslands. Guðrún er í sambúð með Cristoph Wöll og saman eiga þau þrjú börn.
Vatnajökulsþjóðgarður býður Guðrúnu hjartanlega velkomna í nýtt starfshlutverk og þakkar Guðmundi á sama tíma fyrir gott og farsælt starf á liðnum árum.