Ingibjörg Halldórsdóttir ráðin lögfræðingur Vatnajökulsþjóðgarðs

Ingibjörg Halldórsdóttir hefur verið ráðin lögfræðingur Vatnajökulsþjóðgarðs. Staðan var auglýst 5. janúar sl. og alls sóttu 42 um starfið.

Ingibjörg hefur meðal annars starfað í umhverfis- og auðlindaráðuneytinu, hjá Mannvirkjastofnun og Háskóla Íslands. Ingibjörg hefur mikla reynslu af störfum í stjórnsýslunni þar sem hún hefur komið að ýmsum málum á sviði umhverfis- og skipulagsmála bæði sem starfsmaður í stjórnsýslunni og ráðgjafi. Undanfarin ár hefur Ingibjörg verið sjálfstætt starfandi hjá lögmannsstofunni Land og lögmenn og m.a. komið að verkefnum og ráðgjöf fyrir Vatnajökulsþjóðgarð og umhverfis- og auðlindaráðuneytið. Ingibjörg mun hefja störf þann 1. mars næstkomandi.

Vatnajökulsþjóðgarður býður Ingibjörgu velkomna til starfa.

Með ráðningu Ingibjargar verða alls 34 einstaklingar við störf í þjóðgarðinum og þar af eru 29 starfandi á landsbyggðinni. Yfir sumarið fjölgar starfsmönnum og árið 2020 voru alls um 53 ársverk í þjóðgarðinum.