Ingibjörg Halldórsdóttir sett tímabundið í embætti framkvæmdastjóra Vatnajökulsþjóðgarðs
Í liðinni viku tilkynnti Guðlaugur Þór Þórðarson, umhverfis- orku- og loftslagsráðherra að aðsetur og lögheimili Vatnajökulsþjóðgarðs verði flutt til Hafnar í Hornafirði næsta haust. Ákvörðunin var tekin í samráði við stjórn þjóðgarðsins og verður kynnt á næstunni á Alþingi. Einnig var upplýst að Magnús Guðmundsson, núverandi framkvæmdastjóri Vatnajökulsþjóðgarðs, muni flytjast í starf sérfræðings í umhverfis- orku- og loftslagsráðuneytinu þann 1. september nk.
![](/_next/image?url=https%3A%2F%2Fimages.prismic.io%2Fvatnajokulsthjodgardur%2F97fdc150-d402-4f80-8a63-085f88490752_2022%2B05%2B05_Ingibj%25C3%25B6rg%2BHalld%25C3%25B3rsd%25C3%25B3ttir%2Bsett%2Bt%25C3%25ADmabundi%25C3%25B0%2B%25C3%25AD%2Bemb%25C3%25A6tti%2Bframkv%25C3%25A6mdastj%25C3%25B3ra%2BVatnaj%25C3%25B6kuls%25C3%25BEj%25C3%25B3%25C3%25B0gar%25C3%25B0s.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1640%26h%3D820&w=3840&q=80)
Vegna framangreindra breytinga hefur Ingibjörg Halldórsdóttir staðgengill framkvæmdastjóra og sviðsstjóri stjórnsýslusviðs Vatnajökulsþjóðgarðs verið sett í embætti framkvæmdastjóra Vatnajökulsþjóðgarðs frá sama tíma þar til skipað hefur verið í embættið. Ingibjörg er lögfræðingur að mennt og hefur, auk starfa sinna hjá Vatnajökulsþjóðgarði, meðal annars starfað í umhverfis- og auðlindaráðuneytinu, hjá Mannvirkjastofnun, Háskóla Íslands og sem sjálfstætt starfandi lögmaður. Ingibjörg hefur mikla reynslu af störfum í stjórnsýslunni þar sem hún hefur komið að ýmsum málum á sviði umhverfis- og skipulagsmála bæði sem starfsmaður í stjórnsýslunni og ráðgjafi.