Nýir söfnunargámar í Skaftafelli frá Björgunarsveitinni Kára
Björgunarsveitin Kári í Öræfum kom á dögunum í Skaftafell með fyrstu eininguna af nýjum söfnunargámum fyrir skilagjaldsskyldar umbúðir.
![](/_next/image?url=https%3A%2F%2Fimages.prismic.io%2Fvatnajokulsthjodgardur%2F696d54d4-418e-49f3-a50e-a0d9cb52e00f_2021%2B04%2B06%2B-%2Bnyir%2Bsofnunargamar%2Bi%2Bskaftafelli.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1640%26h%3D820&w=3840&q=80)
Björgunarsveitin Kári hefur undanfarin ár séð um að safna skilagjaldsskyldum umbúðum á tjald- og þjónustusvæðinu í Skaftafelli í samstarfi við þjóðgarðinn. Sjálfboðaliðar í björgunarsveitinni flokka síðan umbúðirnar og skila inn til viðkomandi endurvinnsluaðila. Fram til þessa hefur umbúðum verið safnað í svokölluð “netabúr”. Nýju gámarnir eru einfaldari í umgengni en búrin, ásýnd þeirra er betri og vonast er til að skýrari merkingar komi upplýsingum um endurvinnsluflokk betur til skila.
Samstarf Björgunarsveitarinnar Kára og Vatnajökulsþjóðgarðs í Skaftafelli er ávinningur fyrir hringrásarhagkerfið með endurnýtingu á hráefni. Einnig stuðningur fyrir öfluga en fámenna björgunarsveit á svæði þar sem nauðsynlegt er geta brugðist hratt og vel við hættum vegna t.d. slæmra veðurskilyrða, náttúruvár og umferðar.