Vatnajökulsþjóðgarður stækkaður: Herðubreið og Herðubreiðarlindir hluti af þjóðgarðinum
Vatnajökulsþjóðgarður hefur verið stækkaður og svæðið sem tilheyrt hefur Herðubreiðarfriðlandi frá 1974 er nú hluti af þjóðgarðinum.
![](/_next/image?url=https%3A%2F%2Fimages.prismic.io%2Fvatnajokulsthjodgardur%2Ffba48ccf-7a8d-43f2-9793-dd6653b0406b_2019%2B06%2B27-frettir-staekkun%2Bherdubreid%2B1.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1640%26h%3D820&w=3840&q=80)
Vatnajökulsþjóðgarður hefur verið stækkaður og svæðið sem tilheyrt hefur Herðubreiðarfriðlandi frá 1974 er nú hluti af þjóðgarðinum. Guðmundur Ingi Guðbrandsson, umhverfis- og auðlindaráðherra, undirritaði í dag reglugerð þess efnis við Þorsteinsskála í Herðubreiðarlindum. Við þjóðgarðinn bætist einnig stærri hluti Ódáðahrauns en þar er m.a. að finna Kollóttudyngju, Eggert og Bræðrafell.
![](/_next/image?url=https%3A%2F%2Fimages.prismic.io%2Fvatnajokulsthjodgardur%2Fe11cb4ec-c23b-438d-958a-3a2232b830e2_2019%2B06%2B27-frettir-staekkun%2Bherdubreid%2B2.jpg%3Fauto%3Dformat%26crop%3Dfocalpoint%26fit%3Dcrop%26fp-x%3D0.50%26fp-y%3D0.35%26w%3D1640%26h%3D2319&w=3840&q=80)
Með breytingunum bætast 560 km2 við þjóðgarðinn en það er ríflega hálft prósent landsins. Í janúar 2018 hófst formlegt umsóknarferli vegna tilnefningar Vatnajökulsþjóðgarðs á heimsminjaskrá UNESCO og mun niðurstaða heimsminjanefndar liggja fyrir 5. júlí n.k. Svæðisráð norðursvæðis Vatnajökulsþjóðgarðs óskaði eftir stækkun þjóðgarðsins og er hún jafnframt liður í áðurnefndu tilnefningarferli fyrir heimsminjaskrána.
„Stækkun Vatnajökulsþjóðgarðs er mikilvægt skref í náttúruvernd. Með stækkun þjóðgarðsins fylgjum við eftir vilja heimafólks. Stækkunin er að auki liður í átaki stjórnvalda í friðlýsingum og hefur þýðingarmikla tengingu við tilnefninguna á heimsminjaskrána,“ segir Guðmundur Ingi Guðbrandsson, umhverfis- og auðlindaráðherra. „Um er að ræða einstakar jarðminjar og lindasvæði. Það er stórkostlegt að drottning íslenskra fjalla, Herðubreið, tilheyri nú stærsta þjóðgarði í Vestur-Evrópu – og að það gerist á 75 ára afmæli lýðveldisins Íslands.“
![](/_next/image?url=https%3A%2F%2Fimages.prismic.io%2Fvatnajokulsthjodgardur%2F85d4f6ef-e6e7-40eb-980c-50b091d903e3_2019%2B06%2B27-frettir-staekkun%2Bherdubreid%2B3.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1640%26h%3D1089&w=3840&q=80)
Sigríður Auður Arnardóttir ráðuneytisstjóri og Guðmundur Ingi Guðbrandsson skrifa undir reglugerðina
Ódáðahraun einkennist af víðfeðmum hraunbreiðum og vikrum og margar sérstæðar jarðmyndanir eru í hrauninu. Herðubreið er þekktust en hún er stapi sem varð til þegar ísaldarjökull var um 1.000 metra þykkur á þessum slóðum.
Við rætur Herðubreiðar eru Herðubreiðarlindir og Grafarlönd, gróðurvinjar í auðninni. Lindirnar laða að sér fjölbreytt fuglalíf. Heiðagæsir verpa á lækjar- og árbökkum og margar aðrar fuglategundir halda þar til, svo sem straumönd, stokkönd, lómur, sendlingur, lóa, maríuerla, sólskríkja, hávella, óðinshani og kría. Í lindunum ber mest á ætihvönn, gulvíði, grávíði og grasvíði. Litskrúðugust er eyrarrós sem blómstrar frá miðjum júlí og slær þá bleikum lit á eyrar og mela.
![](/_next/image?url=https%3A%2F%2Fimages.prismic.io%2Fvatnajokulsthjodgardur%2F25d00b73-4b64-4dfe-a0f7-302fce364823_2019%2B06%2B27-frettir-staekkun%2Bherdubreid%2B4.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1640%26h%3D1089&w=3840&q=80)
Hanna Kata þjóðgarðsvörður heldur tölu
Í og við Herðubreiðarlindir eru minjar hamfarahlaupa en það eru gífurleg flóð sem hafa komið úr Kverkfjöllum, vegna eldgosa þar og undan Dyngjujökli við eldgos frá Bárðarbungu. Stórir grjóthnullungar og malareyrar eru í hrauninu sunnan lindanna, allt frá ármótum Jökulsár og Kreppu niður fyrir Lindahraun. Eyvindarkofi er í hraunjaðrinum en veturinn 1774-1775 hafði Eyvindur Jónsson, Fjalla-Eyvindur, vetrardvöl í Lindunum. Á svæðinu er því einnig mikilvægar menningarminjar.
Landvarsla hefur verið efld á svæðinu frá og með þessu sumri með fræðslu og upplýsingagjöf og fram undan er aukin uppbygging innviða, svo sem hvað varðar gönguleiðir og merkingar. Fyrir liggur gerð stjórnunar- og verndaráætlunar fyrir svæðið, sem unnin verður af svæðisráði norðursvæðis Vatnajökulsþjóðgarðs, með þátttöku almennings og hagaðila.
![](/_next/image?url=https%3A%2F%2Fimages.prismic.io%2Fvatnajokulsthjodgardur%2Fb099cd8e-f908-4fc2-95da-0e8bf29cccf6_2019%2B06%2B27-frettir-staekkun%2Bherdubreid%2B5.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1640%26h%3D1089&w=3840&q=80)
Kári Kristjánsson landvörður leiddi hópinn í fræðslugöngu um svæðið