Vesturdalsvegi lokað 24. september 2019
Fyrirhugað er að loka vegi 888, Vesturdalsvegi, þriðjudaginn 24. september næstkomandi vegna framkvæmda. Ólíklegt er að vegurinn opni aftur fyrr en vorið 2020.
![](/_next/image?url=https%3A%2F%2Fimages.prismic.io%2Fvatnajokulsthjodgardur%2F81b41046-baed-4c7c-a4a8-f46b9d3289e9_2019%2B09%2B12-%2Bvesturdalsvegi%2Blokad.png%3Fauto%3Dformat%26crop%3Dfocalpoint%26fit%3Dcrop%26fp-x%3D0.45%26fp-y%3D0.50%26w%3D1640%26h%3D820&w=3840&q=80)
Fyrirhugað er að loka vegi 888, Vesturdalsvegi, þriðjudaginn 24. september næstkomandi vegna framkvæmda. Ólíklegt er að vegurinn opni aftur fyrr en vorið 2020.
Endurbætur á Vesturdalsvegi eru hluti af framkvæmd við nýjan Dettifossveg. Nýr vegur verður lagður í vegstæði gamla Vesturdalsvegar frá Dettifossvegi að nýjum útsýnis- og áningarstað á Langavatnshöfða ofan Hljóðakletta. Jafnframt verður vegurinn niður brekkuna og um Vesturdal endurbættur þannig að efni verður keyrt í núverandi veg og á hann lagt bundið slitlag alla leið að bílastæði við Hljóðakletta. Vegurinn kemur hins vegar ekki til með að breikka frá því sem nú er og umferðarhraði á ekki að aukast.
Föstudaginn 20. september munu landverðir í Jökulsárgljúfrum hefja vinnu við að ganga frá í Vesturdal fyrir veturinn. Vatn verður tekið af salernum og blásið úr lögnum, og göngubrýr fjarlægðar þar sem hætta er á að þær skolist annars í burtu í vorleysingum. Áfram verður hægt að ganga leiðina milli Ásbyrgis og Dettifoss en engin þjónusta verður til staðar í Vesturdal.