Snæfell - Þjófadalir
Lagt er upp frá Snæfellsskála eða ekið suður að Langahnjúk og gengið upp með Þjófadalsánni um Þjófadali milli Snæfells og Þjófahnjúka.
Gengið er austur dalinn og út á bakkana, þar er mjög gott útsýni yfir Eyjabakka og Þóriseyjar. Gönguleiðin er frá bílastæði rétt innan við Snæfellsskála og er stikuð að hluta. Af gönguleið á Snæfell kvíslast óstkuð gönguleið til suður inn í Þjófadali.
Tengdar gönguleiðir
Snæfell
Tilkomumikið útsýni af hæsta fjalli utan jökla (1833 m.y.s.). Gönguleiðin er krefjandi og er stikuð frá bílastæði rétt innan við Snæfellsskála allt þar til jöklinum er náð. Göngutími fer eftir aðstæðum en er á bilinu 4 til 7 klukkustundir. Víða á gönguleiðinni er undirlag laust í sér. Mikilvægt er að göngufólk sé búið hlýjum fötum enda oft kalt á toppnum. Æskilegt er að hafa með sér göngustafi og brodda og nauðsynlegt er að hafa staðsetningartæki meðferðis þar sem efsti hluti leiðarinnar getur verið hulinn þoku. Látið landverði í Snæfellsskála vita af ferðum ykkar.