Í Ásbyrgi er stórt tjaldsvæði með aðstöðu fyrir tjöld, fellihýsi og húsbíla. Æskilegt er að bóka tjaldstæði fyrir komu vegna vinsælda tjaldsvæðisins og þá eru einnig meiri líkur á að hægt sé að panta stæði með rafmagnstenglum. Sumarið 2024 opnar tjaldsvæðið 20. maí. 

Ýttu hér til að bóka og greiða fyrir tjaldsvæði í Ásbyrgi

Tjaldsvæðið í Ásbyrgi er opið frá 20. maí til enda október.

Tjaldsvæðinu í Ásbyrgi er skipt í 23 hólf. Í sjö hólfum eru samtals 48 rafmagnstenglar (1500W). Þriggja pinna tengi þarf fyrir tenglana sem og framlengingarsnúru milli stæðis og rafmagnsstaurs.

Tjaldsvæðinu er skipt í 23 hólf og er hvert hólf auðkennt með bókstaf (A, B, C o.s.frv.). Í hverju hólfi er takmarkaður fjöldi tjaldstæða. Stæðin eru hvorki afmörkuð né auðkennd. [Er til skýringarmynd/loftmynd af hólfum?]

Athugið að hólf A, B, C, D, E, F og H eru einungis fyrir þá sem kaupa rafmagn. Enn fremur að hólf S, T, U og V eru ekki aðgengileg farartækjum.

Gæta þarf þess að hafa nægilegt bil á milli gistieininga vegna brunavarna. Á milli stakra tjalda skal bil vera 3 m en hópum er heimilt að tjalda þéttar. Milli húsbíla/ferðavagna skulu vera 4 metrar á milli eininga.

Vert er að hafa í huga að tjaldhólf getur verið uppselt þrátt fyrir að það sé tómt. Því er afar mikilvægt að bóka tjaldsvæði á vefnum áður en útilegubúnaður er settur upp.

Í snyrtihúsi eru salerni, sturtur, þvottavél og þurrkskápur. Afnot af þvottavél og sturtum er innifalið í tjaldsvæðisgjaldi. Uppvöskunaraðstaða er á suðurhlið hússins. Útigrill eru á tjaldsvæðinu (kolagrill), leiktæki og áningarborð. Einnig er lítið salernishús á sunnanverðu tjaldsvæðinu. 

Sýnum öðrum gestum þjóðgarðsins fyllstu kurteisi og tillitssemi í hvívetna. Njótum fuglasöngs og kyrrðar náttúrunnar og spillum henni ekki með háværum tónlistarflutningi eða háreysti. Gætum hófs þegar áfengi er haft um hönd.

Næturfriður skal ríkja á tjaldsvæðum þjóðgarðsins frá kl. 23:30 til 07:00.

Óheimilt er að afla eldiviðar innan marka þjóðgarðsins. Gæta skal þess að skapa hvorki eldhættu né valda gróðurskemmdum með ógætilegri meðferð kolagrilla, gasgrilla eða annarra eldunartækja. Forðast skal að spilla gróðri með því að hella niður heitu vatni eða óhreinu.

Gæludýr eru leyfileg á tjaldsvæðum þjóðgarðsins séu þau í tryggri vörslu umráðamanna sinna. Hundar skulu ávallt vera í bandi. Gæta skal þess að gæludýr valdi ekki truflun á lífríki þjóðgarðsins eða valdi gestum ónæði.

Ávallt skal ganga snyrtilega um tjaldsvæðið og nágrenni þess. Sorp og annan úrgang skal setja í þar til gerð ílát og flokka ef þess gefst kostur. Flöskur og dósir með skilagjaldi má setja í þar til gerðar tunnur.

Tjaldsvæðið í Ásbyrgi

Bóka tjaldsvæði

Verðskrá tjaldsvæðis

Opnunartímar

Aðstaða

Hagnýtar upplýsingar

Hólfaskipting og rafmagnstenglar

Hvar og hvernig má tjalda?

Þjónusta á tjaldsvæðinu

Umgengisreglur