Sveinstindur - Skælingjar - Eldgjá
Gönguleiðin frá Sveinstindi, niður með Skaftá um Skælinga og Eldgjá hefur unnið sér sess sem ein af fegurstu gönguleiðum landsins. Leiðin er 30-40 km eftir því hvaða útgáfa er valin og tekur tvo til þrjá daga. Skálar eru við Sveinstind, í Stóragili á Skælingum og í Hólaskjóli. Hinir fyrrnefndu eru í umsjón Útivistar. Hólaskjól er í eigu Veiðifélags Skaftártungumanna en Icetreck sér um reksturinn. Panta þarf næturgistingu fyrirfram. Leiðin er stikuð að hluta.
Tengdar gönguleiðir
Sveinstindur
Gönguleiðin upp á Sveinstind (1089 m) er um 2 km löng með um 400 metra hækkun.Uppgangan hefst við bílastæði sem er suðvestan við fjallsræturnar. Fegurri útsýnisfjöll eru vandfundin á Íslandi.
Gengið kringum Sveinstind
Frá bílastæðinu við suðurenda Langasjávar er genginn vegslóði inn með Sveinstindi að norðan, meðfram Langasjó og síðan beygt til suðurs við enda Fagralóns. Fljótlega er komið að smalaslóða og hann genginn til baka og suður fyrir Sveinstind. Leiðin er óstikuð.
Eldgjá - Ófærufoss
Frá bílastæðinu í Eldgjá er gengið eftir botni gjárinnar og að útsýnispalli við Ófærufoss. Á leiðinni gnæfabarmar gjárinnar yfir göngufólkinu, sem öðlast tilfinningu fyrir þeim hamförum sem þarna hafa átt sér stað. Hægt er að ganga aðra leiðina upp á eystri gjárbarminum, við það lengist leiðin örlítið og um 150 m hækkun bætist við en útsýnið er þess virði.