Ýmis starfsemi innan Vatnajökulsþjóðgarðs krefst leyfis eins og rannsóknir, kvikmynda- og auglýsingagerð og viðburðahald. 

Samstarf Vatnajökulsþjóðgarðs við vísindasamfélagið er bæði lögbundið og afar verðmætt. Unnið er að fjölþættum rannsóknum í síkvikri náttúru Vatnajökulsþjóðgarðs ár hvert. Þjóðgarðurinn er einnig fjölsóttur vettvangur fyrir kvikmynda- og auglýsingatökur og notkun ferðafólks á flygildum er sífellt vinsælli.

Markmið með stofnun Vatnajökulsþjóðgarðs samkvæmt 2. gr. laga um þjóðgarðinn er að:

Vernda náttúru svæðisins, svo sem landslag, lífríki, jarðmyndanir og menningarminjar.

Gefa almenningi kost á að kynnast og njóta náttúru og sögu svæðisins.

Stuðla að rannsóknum á svæðinu, fræða um það og ýta undir aukinn skilning almennings á gæðum og sérstöðu svæðisins.

Leitast við að styrkja byggð og atvinnustarfsemi í nágrenni þjóðgarðsins, m.a. með því að hvetja til sjálfbærrar nýtingar gæða svæðisins.

Framangreind markmið eru leiðarljós í öllu starfi þjóðgarðsins og stefnumótun. Frumskilyrði er ávallt að starfsemin samræmist þessum markmiðum.

Reglur um notkun flygilda (dróna) í afþreyingarskyni

Ýttu hér fyrir nánari upplýsingar um notkun flygilda í afþreyingarskyni

Almennt er notkun flygilda (dróna) í afþreyingarskyni heimil í Vatnajökulsþjóðgarði og fylgja skal almennum reglum Samgöngustofu varðandi notkun flygilda. Á nokkrum svæðum í þjóðgarðinum gilda þó svæðisbundnar takmarkanir (almennar og svæðisbundnar). 

Þau sem hafa hug á að stunda kvikmyndagerð, auglýsingagerð eða aðra slíka starfsemi innan þjóðgarðsins fylla út umsókn um leyfi í þjónustugátt (hlekkur á umsóknarform neðar á síðu).
Sækja skal um leyfi með minnst 30 daga fyrirvara. Innheimt er fyrir kvikmynda- og auglýsingaleyfi samkvæmt verðskrá Vatnajökulsþjóðgarðs.

Kvikmynda- og auglýsingaleyfi í atvinnuskyni

Stuðst er við 1. mgr. 38. gr. reglugerðar um Vatnajökulsþjóðgarð nr. 300/2020 en þar sem segir: Afla skal leyfis þjóðgarðsvarðar vegna skipulagðra viðburða og verkefna sem kalla á aðstöðu, mannafla eða meðferð tækja í þjóðgarðinum, svo sem til kvikmyndunar, listviðburða, samkomuhalds og rannsókna.

Þau sem hafa hug á að stunda kvikmyndagerð, auglýsingagerð eða aðra slíka starfsemi innan þjóðgarðsins fylla út umsókn um leyfi í þjónustugátt (sjá hlekk neðar).

Í umsókninni skal koma fram lýsing á þeim viðburði/verkefni sem óskað er leyfis fyrir, og eftir atvikum upplýsingar um áætlaðan fjölda gesta og starfsfólks, fyrirhugaða aðstöðu og tækjabúnað, tímasetningu viðburðar/verkefnis og tímalengd og staðsetning og stærð svæðis þar sem óskað er eftir að viðburður/verkefni fari fram. 
Umsækjandi skal með umsóknargögnum sýna fram á að viðburðurinn/verkefnið sem óskað er leyfis fyrir samræmist ákvæðum laga um Vatnajökulsþjóðgarð, reglugerðar um Vatnajökulsþjóðgarð og stjórnunar- og verndaráætlun þjóðgarðsins og að ekki sé hætta á spjöllum á náttúru, menningarminjum eða mannvirkjum þjóðgarðsins. Starfsfólk Vatnajökulsþjóðgarðs leiðbeinir umsækjanda um hvaða gögn skulu fylgja umsókn og geta ávallt óskað eftir að lagðar verði fram frekari upplýsingar og skýringar varðandi framkvæmd og fyrirkomulag.

Sækja skal um leyfi með minnst 30 daga fyrirvara og fyrr ef aðstæður og umfang krefjast.  Innheimt er fyrir kvikmynda- og auglýsingaleyfi samkvæmt verðskrá Vatnajökulsþjóðgarðs.

Leyfishafi hefur leyfisbréf tiltækt á vettvangi þess viðburðar/verkefnis sem heimilað hefur verið og framvísa því við starfsfólk þjóðgarðsins ef þess er óskað.

Leyfishafa fylgir skilmálum leyfis og kynnir sér og virðir ákvæði laga um Vatnajökulsþjóðgarð, ákvæði reglugerðar um þjóðgarðinn, umgengnisreglur, svo og ákvæði stjórnunar- og verndaráætlunar. Leyfishafi, starfsfólk hans og gestir á hans vegum ganga vel um náttúru þjóðgarðsins og menningarminjar og sýna ýtrustu varúð og tillitssemi svo að náttúru, menningarminjum og mannvirkjum þjóðgarðsins verði ekki spillt, sbr. 1. mgr. 9. gr. reglugerðar um Vatnajökulsþjóðgarð.

Hlíta ber fyrirmælum þjóðgarðsvarða og annars starfsfólks þjóðgarðsins um umgengni og háttsemi í þjóðgarðinum, sbr. 2. mgr. 9. gr. reglugerðar um Vatnajökulsþjóðgarð. Þjóðgarðsverði er heimilt að stöðva starfsemi leyfishafa ef sýnt þykir að hún geti og/eða hafi haft neikvæð áhrif á náttúru- og menningarminjar og mannvirki þjóðgarðsins og er jafnframt heimilt að vísa leyfishafa, starfsfólki hans eða gestum á hans vegum úr þjóðgarðinum brjóti viðkomandi gegn ákvæðum laga um Vatnajökulsþjóðgarð eða reglugerðar þjóðgarðsins. Brot gegn lögunum og reglugerðum settum samkvæmt þeim varða sektum eða fangelsi allt að tveimur árum.

Þjóðgarðsvörður og annað starfsfólk þjóðgarðsins í umboði hans hafa eftirlit með því að leyfishafi virði skilyrði leyfisins og ákvæði þeirra laga og reglugerða sem gilda um framkvæmd viðburðarins/verkefnisins, sbr. 3. tl. 10. gr. laga um Vatnajökulsþjóðgarð. Leyfishafa ber að veita þjóðgarðsverði allar þær upplýsingar og gögn sem þjóðgarðsvörður telur þörf á til að rækja eftirlitshlutverk sitt.

Heimilt er að hafa eftirlitsmann á vettvangi telji þjóðgarðsvörður þess þörf vegna verndunarsjónarmiða og er það þá tilgreint í leyfisbréfi. Leyfishafi greiðir fyrir það samkvæmt verðskrá. Ef leyfishafi brýtur ákvæði leyfisbréfs fellur leyfið úr gildi.

Útgefin leyfi gætu verið birt á vef Vatnajökulsþjóðgarðs.

Hagnýtar upplýsingar áður en sótt er um kvikmyndaleyfi

Ýttu hér til að sækja um kvikmynda- eða auglýsingaleyfi

Þau sem hafa hug á að stunda rannsóknir í þjóðgarðinum fylla út umsókn um leyfi í þjónustugátt (hlekkur á umsóknarform neðar á síðu). Sækja skal um leyfi með minnst 30 daga fyrirvara.

Eitt af markmiðum með stofnun Vatnajökulsþjóðgarðs er að stuðla að rannsóknum á svæðinu, sbr. 1. mgr. 2. gr. laga um Vatnajökulsþjóðgarð nr. 60/2007. Samkvæmt 1. mgr. 38. gr. reglugerðar um Vatnajökulsþjóðgarð nr. 300/2020 skal afla leyfis þjóðgarðsvarðar vegna allra verkefna sem kalla á aðstöðu, mannafla eða meðferð tækja í þjóðgarðinum, þ.m.t. vegna rannsókna innan þjóðgarðsins. Sækja þarf um leyfi samkvæmt þessu fyrir allar rannsóknir á náttúrufari og menningarminjum í Vatnajökulsþjóðgarði sem eru ekki á vegum þjóðgarðsyfirvalda eða hluti af framkvæmd samþykktrar stjórnunar- og verndaráætlunar þjóðgarðsins.

Þau sem hyggjast stunda rannsóknir innan þjóðgarðsins þurfa jafnframt að gæta að því að sækja um tilskilin leyfi til rannsókna frá öðrum aðilum, svo sem ef um er að ræða rannsóknir á örverum á jarðhitasvæðum, sjá 34. gr. laga nr. 57/1998, rannsóknir á steingervingum, sjá 60. gr. laga um náttúruvernd nr. 60/2013 eða rannsóknir á friðlýstum plöntu- eða dýrategundum. Ef flytja á út náttúrugripi (rannsóknarsýni getur fallið undir hugtakið náttúrugripur) þarf leyfi Náttúrufræðistofnunar Íslands, sjá 15. gr. laga nr. 60/1992.

Þau sem hafa hug á að stunda rannsóknir samkvæmt 1. gr. í þjóðgarðinum fylla út umsókn um leyfi í þjónustugátt (hlekkkur á umsóknarform neðar á síðu). Í umsókninni skal koma fram lýsing á fyrirhuguðum rannsóknum sem óskað er leyfis fyrir og staðsetning þeirra, sem og eftir atvikum upplýsingar um áætlaðan fjölda starfsmanna, fyrirhugaða aðstöðu og tækjabúnað, tímasetningu rannsóknar og tímalengd.

Sækja skal um leyfi með minnst 30 daga fyrirvara.

Leyfishafi hefur leyfisbréf tiltækt á vettvangi þeirrar rannsóknar sem heimiluð hefur verið og framvísar því við starfsfólks þjóðgarðsins ef þess er óskað.

Leyfishafa fylgir skilmálum leyfis og kynnir sér og virðir ákvæði laga um Vatnajökulsþjóðgarð, ákvæði reglugerðar um þjóðgarðinn, svo og ákvæði stjórnunar- og verndaráætlunar. Leyfishafi og starfsfólk hans ganga vel um náttúru þjóðgarðsins og menningarminjar og sýna ýtrustu varúð og tillitssemi svo að náttúru, menningarminjum og mannvirkjum þjóðgarðsins verði ekki spillt, sbr. 1. mgr. 9. gr. reglugerðar um Vatnajökulsþjóðgarð.

Hlíta ber fyrirmælum þjóðgarðsvarða og annars starfsfólks þjóðgarðsins um umgengni og háttsemi í þjóðgarðinum, sbr. 2. mgr. 9. gr. reglugerðar um Vatnajökulsþjóðgarð. Þjóðgarðsverði er heimilt að stöðva rannsókn eða athafnir henni tengdar ef sýnt þykir að hún geti og/eða hafi haft neikvæð áhrif á náttúru- og menningarminjar og mannvirki þjóðgarðsins og er jafnframt heimilt að vísa leyfishafa, starfsfólki hans eða gestum á hans vegum úr þjóðgarðinum brjóti viðkomandi gegn ákvæðum laga um Vatnajökulsþjóðgarð eða reglugerðar þjóðgarðsins. Brot gegn lögunum og reglugerðum settum samkvæmt þeim varða sektum eða fangelsi allt að tveimur árum.

Þjóðgarðsvörður og annað starfsfólk þjóðgarðsins í umboði hans hafa eftirlit með því að leyfishafi virði skilyrði leyfisins og ákvæði þeirra laga og reglugerða sem gilda um framkvæmd rannsóknarinnar. Leyfishafa ber að veita þjóðgarðsverði allar þær upplýsingar og gögn sem þjóðgarðsvörður telur þörf á til að rækja eftirlitshlutverk sitt. Leyfi falla úr gildi ef ekki er farið eftir skilyrðum leyfis.

Heimilt er að hafa eftirlitsmann á vettvangi þar sem rannsókn fer fram telji þjóðgarðsvörður þess þörf vegna verndunarsjónarmiða og skal það þá tilgreint í leyfisbréfi. Leyfishafi greiðir fyrir það samkvæmt verðskrá.

Þess er óskað að niðurstöður rannsókna, skýrslur og tengt efni verði sent til þjóðgarðsins . Þá er kynningarefni um rannsóknir fyrir gesti þjóðgarðsins í útdrætti á einblöðungi, á veggspjöldum eða í formi fyrirlestra, vel þegið. Óskað er eftir þessum upplýsingum með vísan til 2. gr. reglugerðar um Vatnajökulsþjóðgarð þar sem fram kemur að í þjóðgarðinum skuli veita fræðslu um náttúru og náttúruvernd, sögu, mannlíf og menningarminjar svæðisins og stuðla að rannsóknum til að efla þekkingu á þessum þáttum.

Hagnýtar upplýsingar áður en sótt er um rannsóknarleyfi

Ýttu hér til að sækja um rannsóknarleyfi

Hér er hægt að sækja um leyfi til þess að halda aðra viðburði en fjallað er um hér að ofan. Dæmi um viðburði geta verið: Íþróttamót, samkomur (brúðkaup, afmæli, ættarmót o.s.frv.), tónleikar, kvikmyndasýningar o.s.frv. Sækja skal um leyfi vegna viðburðahalds með eins löngum fyrirvara og umsækjanda er unnt.

Samkvæmt 38. gr reglugerðar um Vatnajökulsþjóðgarð nr. 300/2020 skal afla leyfis þjóðgarðsvarðar vegna skipulagðra viðburða og verkefna sem kalla á aðstöðu, mannafla eða meðferð tækja í þjóðgarðinum, svo sem til kvikmyndunar, listviðburða, sam­komu­halds og rannsókna. Dæmi um viðburði geta verið: Íþróttamót, samkomur (brúðkaup, afmæli, ættarmót o.s.frv.), tónleikar, kvikmyndasýningar o.s.frv. 
Sá sem óskar eftir slíku leyfi sendir umsókn í gegnum þjónustugátt (hlekkur neðar á síðu). Starfsfólk Vatnajökulsþjóðgarðs leiðbeinir umsækjanda um hvaða gögn skulu fylgja umsókn og geta ávallt óskað eftir að lagðar verði fram frekari upplýsingar og skýringar varðandi framkvæmd og fyrirkomulag.
Ákvörðun um veitingu leyfis er tekin með hliðsjón af öryggissjónarmiðum, verndar­markmiðum þjóðgarðsins og stjórnunar- og verndaráætlun. Setja má þau skilyrði fyrir leyfis­­veitingu sem talin er þörf á, svo sem um umgengni og takmarkanir.

Sækja skal um leyfi vegna viðburðahalds með eins löngum fyrirvara og umsækjanda er unnt. Í þeim tilfellum þar sem þjóðgarðurinn þarf að leggja til starfsfólk gæti verið innheimt gjald fyrir viðburðaleyfi samkvæmt verðskrá Vatnajökulsþjóðgarðs.

Umsækjandi kynnir sér og virðir ákvæði laga og reglugerðar um Vatnajökulsþjóðgarð og ákvæði stjórnunar- og verndaráætlunar fyrir þjóðgarðinn við starfsemi sína sem og aðra löggjöf sem um starfsemina gildir. Umsækjandi, starfsfólk hans og gestir á hans vegum ganga vel um náttúru þjóðgarðsins og menningarminjar og sýna ýtrustu varúð og tillitssemi svo að náttúru, menningarminjum og mannvirkjum þjóðgarðsins verði ekki spillt, sbr. 1. mgr. 9. gr. reglugerðar um Vatnajökulsþjóðgarð. Þá skal umsækjandi tryggja að fyllsta öryggis sé ávallt gætt.

Vatnajökulsþjóðgarður hefur með höndum eftirlit með viðburðum innan þjóðgarðsins. Þjóðgarðsvörður getur krafist nauðsynlegra upplýsinga vegna eftirlitsins og ber aðilum að fylgja fyrirmælum hans.

Hlíta ber fyrirmælum þjóðgarðsvarða og annars starfsfólks þjóðgarðsins um umgengni og háttsemi í þjóðgarðinum, sbr. 2. mgr. 9. gr. reglugerðar um Vatnajökulsþjóðgarð.
Þjóðgarðsverði er heimilt að loka þjóðgarðinum eða einstökum svæðum hans fyrirvaralaust ef hann telur að dvöl manna eða umferð geti spillt lífríki, jarðmyndunum, landslagi eða menningarminjum eða ef hættuástand skapast í þjóðgarðinum vegna náttúruvár. Þjóðgarðsverði er heimilt að vísa úr þjóðgarðinum hverjum þeim sem brýtur ákvæði laga um Vatnajökulsþjóðgarð eða reglugerðar þjóðgarðsins. Brot gegn lögunum og reglugerðum settum samkvæmt þeim varða sektum eða fangelsi allt að tveimur árum.

Þjóðgarðsvörður og annað starfsfólk þjóðgarðsins í umboði hans hafa eftirlit með því að umsækjandi virði skilyrði útgefins leyfis og ákvæði laga og reglugerðar um Vatnajökulsþjóðgarð. Umsækjanda ber að veita þjóðgarðsverði allar þær upplýsingar og gögn sem hann telur þörf á til að rækja eftirlitshlutverk sitt.

Hagnýtar upplýsingar áður en sótt er um leyfi til viðburðahalds

Ýttu hér til að sækja um leyfi fyrir viðburðahald

Hægt er að kynna sér verðskrá Vatnajökulsþjóðgarðs hér vegna útgáfu leyfa

Leyfi

Markmið með stofnun Vatnajökulsþjóðgarðs samkvæmt 2. gr. laga um þjóðgarðinn er að:

Reglur um notkun flygilda (dróna) í afþreyingarskyni

Kvikmynda- og auglýsingaleyfi í atvinnuskyni

Kvikmynda- og auglýsingaleyfi í atvinnuskyni

Hagnýtar upplýsingar áður en sótt er um kvikmyndaleyfi

Kvikmynda- og auglýsingaleyfi í atvinnuskyni

Almennir skilmálar

Sækja um kvikmynda- og auglýsingaleyfi

Rannsóknaleyfi

Rannsóknaleyfi

Hagnýtar upplýsingar áður en sótt er um rannsóknarleyfi

Rannsóknarleyfi

Almennir skilmálar

Sækja um rannsóknaleyfi

Viðburðahald

Viðburðahald

Hagnýtar upplýsingar áður en sótt er um leyfi til viðburðahalds

Leyfi til viðburðahalds

Almennir skilmálar

Sækja um leyfi til viðburðahalds

Verðskrá Vatnajökulsþjóðgarðs