Fjallsárlón

Gönguleiðin hefst vestan megin, fyrir aftan veitingastaðinn Frost en þar má sjá fræðsluskilti með upplýsingum um svæðið. Frá fræðsluskiltinu liggur merktur malarstígur niður að Fjallsárlóni. Á leiðinni niður að lóninu er komið að útsýnisstað þar sem má horfa yfir Hrútárjökul, Ærfjall, Fjallsjökul, Breiðamerkurfjall og Fjallsárlón. Síðan er haldið áfram eftir stígnum en rétt áður en komið er að lóninu kemur annar stikaður stígur sem liggur í austur, alla leiðina á Jökulsárlón. Í staðinn fyrir að beygja þennan slóða til hægri er haldið áfram meðfram lóninu þar til að hann beygir örlítið til vinstri og gengið er upp á smá hæð. Þegar komið er upp á hæðinni má sjá vegslóða sem áður var þjóðvegurinn. Gengið er eftir honum þar til komið er aftur að veitingastaðnum og bílastæðinu.