![Horft yfir Kverkfjöll](/_next/image?url=https%3A%2F%2Fimages.prismic.io%2Fvatnajokulsthjodgardur%2F3b9c4042-4575-4b80-9ef1-e43abf7cbd0b_Kverkfj%25C3%25B6ll%2Bs%25C3%25B3lsetur_%25C3%259EM%25C3%259E.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1100%26h%3D724&w=3840&q=80)
Kverkfjöll
Kverkfjöll eru mikil megineldstöð í norðurbrún Vatnajökuls og þriðji hæsti fjallbálkur landsins á eftir Öræfajökli og Bárðarbungu.
Tvær jökulfylltar öskjur eru taldar vera í Kverkfjöllum og á Kverkfjallahrygg. Er syðri askjan jökli hulin en rimar þeirrar nyrðri eru að mestu íslausir nema að sunnanverðu; liggja þeir í um og yfir 1800 m hæð. Hæst rís Skarphéðinstindur á austanverðu fjallinu í 1936 metra hæð yfir sjávarmál. Skipta má Kverkfjöllum í eystri og vestari hluta um Kverk sem er mikið skarð í fjöllin norðanverð með geysiháum þverhníptum hamraveggjum. Út um Kverk skríður Kverkjökull til norðvesturs niður undir hásléttuna í um 900 metra hæð. Beggja vegna Kverkfjalla falla frá ísaskilum langt suður á Vatnajökli afar stórir skriðjöklar aflíðandi norður á hásléttuna, í vestri er Dyngjujökull en Brúarjökull í austri.
Kverkfjallarani er að meginhluta byggður upp af samsíða móbergshryggjum, 5-6 talsins, og fara hnjúkar hækkandi eftir því sem nær dregur Kverkfjöllum. Sigdalur sem Hraundalur kallast liggur um ranann endilangan með stefnu á Kverk og skiptir honum í Austur- og Vesturrana. Niður í innsta hluta hans skríða urðarjöklar frá Kverkfjöllum eystri.
Jökuláin Kreppa fellur undan vesturjaðri Brúarjökuls en Jökulsá á Fjöllum í mörgum kvíslum undan Dyngjujökli. Vatnsmestu kvíslar Jökulsár koma undan jökli rétt vestan Kverkfjalla en lengra til vesturs hverfa kvíslar niður í sandorpin hraun. Þar sest til fínn jökulleir sem þyrlast upp í vindi og verða af miklir misturstrókar sem taka fyrir útsýni og geta borist langar leiðir.
Gönguleiðir í nágrenninu
Sigurðarskáli - Kverkjökull
Um þrír kílómetrar eru að sporði Kverkjökuls, eftir gönguleið yfir jökulruðning eða eftir bílaslóð inn á jökulurðina skammt frá ánni Volgu. Gæta þarf ítrustu varúðar vegna hruns við jökuljaðarinn.
![](/_next/image?url=https%3A%2F%2Fimages.prismic.io%2Fvatnajokulsthjodgardur%2Fe5d9ac55-2efe-4b73-b7f8-5fb8cf41d52a_Kverkfj%25C3%25B6ll%2Bg%25C3%25B6ngum_18_SRR.jpg%3Fauto%3Dformat%26crop%3Dfocalpoint%26fit%3Dcrop%26fp-x%3D0.37%26fp-y%3D0.50%26w%3D277%26h%3D196&w=640&q=80)
Sigurðarskáli - Virkisfell
Gengið er inn og upp frá Sigurðarskála úr suðri á Virkisfell (1108 m). Fallegt útsýni yfir hálendið og Kverkfjöll.
Sigurðarskáli - Biskupsfell
Gengið er inn og upp frá Sigurðarskála úr suðri á Virkisfell (1108 m). Biskupsfell (1240 m) er hálfum öðrum kílómetra austar, einnig auðvelt uppgöngu sunnan frá. Þaðan blasir við Tvíhyrna (1240 m).